काभ्रे । काभ्रेपलाञ्चोकको बेथानचोक गाउँपालिका–ढुङ्खर्ककी नबिना केसी अहिले स्थानीयस्तरमै मेहनत, आत्मनिर्भरता र पारिवारिक जिम्मेवारीको प्रेरणादायी उदाहरण बनेकी छन्। ‘खुवा वाली’ चेलीका रूपमा परिचित उनी आफ्नो पढाइलाई निरन्तरता दिँदै बुबा–आमाको परम्परागत दुग्ध व्यवसायमा सक्रिय रूपमा साथ दिइरहेकी छन्।

ढुङ्खर्क क्षेत्रका करिब ५० देखि ६० जना किसानबाट दैनिक दूध संकलन गरी नबिना र उनको परिवारले खुवा, नौनी, मही र घिउ उत्पादन गर्दै उपभोक्तालाई गुणस्तरीय दुग्ध परिकार उपलब्ध गराइरहेका छन्। स्थानीय किसानले उत्पादन गरेको दूधलाई बजारसँग जोड्दै उनीहरूले किसानको आम्दानी बढाउन पनि महत्वपूर्ण योगदान पुर्‍याएका छन्।

पढाइसँगै व्यवसायलाई सन्तुलित रूपमा अघि बढाउँदै नबिना केसीले आफ्नै गाउँमा पनि मेहनत, लगनशीलता र इच्छाशक्ति भए राम्रो आम्दानी गर्न सकिन्छ भन्ने सन्देश दिएकी छन्। परिवारको खुसीमा रमाउँदै आफ्नै माटोमा भविष्य खोज्ने उनको सोच धेरै युवाका लागि प्रेरणाको स्रोत बनेको छ।

स्थानीय उत्पादनको प्रवर्द्धन, किसानको श्रमको सम्मान र आत्मनिर्भर जीवनशैलीलाई व्यवहारमै उतारेकी कर्मशील चेली नबिना केसीको यो यात्रा धेरैका लागि उदाहरणीय बनेको छ।